Wednesday, October 20, 2010

കരിക്ക് പുഡിംഗ്

ഇനി തേങ്ങ വെട്ടിക്കുമ്പോള്‍ കുറച്ച് കരിക്ക് കൂടി വെട്ടിച്ചോളൂ. കൂട്ടികള്‍ക്ക് ഏറെ ഇഷ്ടമുള്ള പുഡിംഗ് ഉണ്ടാക്കാം.


കരിക്ക് പുഡിംഗിന് ആവശ്യമായ സാധനങ്ങള്‍ ഏതൊക്കെ എന്നു നോക്കാം.

1 കരിക്ക് = 2 കപ്പ്
കരിക്കിന്‍ വെള്ളം = 1 1/2 കപ്പ്

2 മുട്ട = 2 എണ്ണം
പാല്‍ = 2 കപ്പ്
കണ്ടന്‍സ്ഡ് മില്‍ക്ക് = 1 കപ്പ്
പഞ്ചസാര = 2 ടേബിള്‍ സ്പൂണ്‍

3 ജലാറ്റിന്‍ = 2 ടേ. സ്പൂണ്‍
വെള്ളം = 1/4 കപ്പ്


4 വനില എസന്‍സ് = 1 റ്റീ സ്പൂണ്‍


5 കിസ്മിസ്, ബദാം, അണ്ടിപ്പരിപ്പ് = അലങ്കരിക്കാന്‍


ഇനി നമുക്ക് കരിക്ക് പുഡിംഗ് തയ്യാറാക്കുന്നത് എങ്ങനെയെന്ന് നോക്കാം.





കരിക്ക് ചെറിയ കഷണങ്ങളായി ചുരണ്ടിയെടുക്കുക.





മുട്ട ഉണ്ണിയും വെള്ളയും വേര്‍തിരിച്ചെടുക്കണം. ഒരു പാത്രത്തില്‍ മുട്ടയുടെ ഉണ്ണിയെടുത്ത് നന്നായി അടിച്ചു പതപ്പിക്കുക. ഇതിലേയ്ക്ക് രണ്ടാമത്തെ ചേരുവകളിലെ ബാക്കിയുള്ളചേരുവകളും ചേര്‍ത്ത് നന്നായി യോജിപ്പിക്കുക.







ഈ കൂട്ട് ഒരു പാത്രത്തിലാക്കി ഡബിള്‍ ബോയിലിംഗ് രീതിയില്‍ കുറുക്കുക. (ഒരു പാത്രത്തിലെ തിളയ്ക്കുന്ന വെള്ളത്തിലേയ്ക്ക് വച്ച് നേരിട്ടല്ലാതെ ചൂടാക്കുന്ന രീതി). ഇത് നല്ലതു പോലെ കുറുക്കി എടുക്കുക. ഇനി ഇത് അടുപ്പില്‍ നിന്ന് മാറ്റി തണുക്കാന്‍ വയ്ക്കണം.

ജലാറ്റിന്‍ വെള്ളത്തില്‍ കലക്കി അതും മേല്‍പ്പറഞ്ഞ രീതിയില്‍ ഉരുക്കുക.




ഇനി മുട്ടയുടെ വെള്ള അടിച്ച് പതപ്പിക്കാം. ഇതിലേയ്ക്ക് എസന്‍സ് ചേര്‍ത്ത് ഇളക്കുക.




ആദ്യം തയ്യാറാക്കിയ കൂട്ട് തണുത്ത് കഴിഞ്ഞാല്‍ ഇതിലേയ്ക്ക് ഒന്നാമത്തെ ചേരുവകള്‍ ചേര്‍ത്ത് ഇളക്കുക. മുട്ടയുടെ വെള്ള പതപ്പിച്ചതും ജലാറ്റിന്‍ ഉരുക്കിയതും ചേര്‍ത്ത് യോജിപ്പിക്കുക.




ഇത് ഒരു പാത്രത്തിലാക്കി. സെറ്റ് ചെയ്യാന്‍ ഫ്രീസറില്‍ വയ്ക്കാം. നല്ലതുപോലെ സെറ്റായി കഴിഞ്ഞാല്‍ ഫ്രീസറില്‍ നിന്ന് മാറ്റി ഫ്രിഡ്ജിലെ മറ്റേതെങ്കിലും തട്ടില്‍ വയ്ക്കുക. അണ്ടിപ്പരിപ്പ്, കിസ്മിസ്, ബദാം എന്നിവ ഉപയോഗിച്ച് അലങ്കരിക്കാം.




കരിക്ക് പുഡിംഗ് തയ്യാര്‍.






ഇനി കുട്ടികള്‍ക്ക് വിളമ്പിക്കോളൂ. മുതിര്‍ന്നവര്‍ക്കും എടുക്കാം കേട്ടോ.

Tuesday, October 12, 2010

പാലക് പനീര്‍

ചപ്പാത്തിയ്ക്കൊപ്പം കഴിക്കാന്‍ പറ്റിയ നല്ലൊരു ഉത്തരേന്ത്യന്‍ വിഭവമാണ് പാലക് പനീര്‍. ഉണ്ടാക്കാനും എളുപ്പമാണ്. പനീറിനു പകരം ഉരുളന്‍ കിഴങ്ങ് ചേര്‍ത്തും ഉണ്ടാക്കാം. അപ്പോള്‍ ആലൂ പാലക് ആകും.



ആവശ്യമുള്ള സാധനങ്ങള്‍




പാലക് = ഒരു കെട്ട്
പനീര്‍ = 100 ഗ്രാം
ജീരകം = 1 റ്റീ സ്പൂണ്‍
സവാള = 2 ഇടത്തരം
തക്കാളി = 2 ഇടത്തരം
ഇഞ്ചി ചതച്ചത് = 1/2 റ്റീ സ്പൂണ്‍
വെളുത്തുള്ളി = 1/2 റ്റീ സ്പൂണ്‍
പച്ചമുളക് = ഒന്നോ രണ്ടോ
മല്ലിപ്പൊടി = 2 റ്റീ സ്പൂണ്‍
മുളക് പൊടി = 1/2 റ്റീ സ്പൂണ്‍
മഞ്ഞള്‍പ്പൊടി = 1/2 റ്റീ സ്പൂണ്‍
ജീരകപ്പൊടി = 1/4 റ്റീ സ്പൂണ്‍
ഗരം മസാല = 1/2 റ്റീ സ്പൂണ്‍
ഉപ്പ് = ആവശ്യത്തിന്
എണ്ണ/നെയ്യ്/വെണ്ണ = 2 റ്റേബിള്‍ സ്പൂണ്‍
മല്ലിയില = അല്‍പം

പാചകരീതി

പാലക് ചീര തണ്ട് കളഞ്ഞ് നന്നായി കഴുകുക. പ്രഷര്‍ കുക്കറില്‍ പാലക് രണ്ടോ മൂന്നോ വിസില്‍ കേള്‍പ്പിക്കുക.


തണുത്തതിനു ശേഷം മിക്സിയില്‍ അടിച്ച് ഇതുപോലെ നല്ല കുഴമ്പു പോലെ ആക്കുക.



ഒരു ഫ്രൈ പാനില്‍ എണ്ണയോ നെയ്യോ വെണ്ണയോ ഏതാണ് ഇഷ്ടമുള്ളത് അതെടുക്കുക. ഞാനിവിടെ നെയ്യാണ് എടുത്തത്. ഏണ്ണ ആയാലും കുഴപ്പമില്ല. ഏതായാലും വെളിച്ചെണ്ണ വേണ്ട.


എണ്ണ/നെയ്യ് ചൂടാകുമ്പോള്‍ പനീര്‍ ഇതു പോലെ ഗോള്‍ഡന്‍ കളറില്‍ വറുത്ത് കോരുക.


ബാക്കി എണ്ണയില്‍ ജീരകം വറുക്കുക. സവാള ചെറുതായിട്ട് അരിഞ്ഞത് ചേര്‍ത്ത് ഗോള്‍ഡന്‍ ബ്രൗണ്‍ നിറമാകുന്നതുവരെ വഴറ്റുക. ഇഞ്ചിയും വെളുത്തുള്ളിയും കൂടി ചതച്ചതും ചേര്‍ത്ത് നന്നായി വഴറ്റുക. നന്നായി വഴളുമ്പോള്‍ ചെറുതായി അരിഞ്ഞ തക്കാളിയും പച്ചമുളക് അരിഞ്ഞതും ചേര്‍ത്ത് വഴറ്റുക. മുളക് പൊടി, മല്ലിപ്പൊടി, മഞ്ഞള്‍പ്പൊടി, ജീരകപ്പൊടി, ഗരം മസാല എന്നിവ ചേര്‍ത്ത് എണ്ണ തെളിയുന്നതുവരെ വഴറ്റണം. തവികൊണ്ട് നന്നായി ഉടച്ച് ചേര്‍ക്കണം.


ഇനി ഇതിലേയ്ക്ക് പാലക് അരച്ചു വച്ചത് ചേര്‍ക്കാം.


വേണമെങ്കില്‍ എല്ലാം കൂടി ഒന്ന് കൂടി മിക്സിയില്‍ അടിച്ചെടുക്കാം. ഞാന്‍ തവികൊണ്ട് ഉടച്ച് ചേര്‍ക്കുകയാണ് പതിവ്.


ആവശ്യത്തിന് ഉപ്പും ചേര്‍ത്ത് ഒന്ന് തിളപ്പിക്കുക.

ഇനി ഇതിലേയ്ക്ക് വറുത്തു വച്ചിരിക്കുന്ന പനീര്‍ കഷ്ണങ്ങള്‍ ചേര്‍ക്കാം.



അല്‍പം വെണ്ണ അല്ലെങ്കില്‍ നെയ്യ് ഒഴിച്ച് അരിഞ്ഞ മല്ലിയിലയും വിതറി അലങ്കരിക്കാം.



പാലക് പനീര്‍ തയ്യാര്‍.




പനീറിനു പകരം ഉരുളന്‍ കിഴങ്ങ് വേവിച്ച് കഷ്ണങ്ങളാക്കി ചേര്‍ത്താല്‍ ആലൂ പാലക് തയ്യാറാക്കാം. ഇത് രണ്ടും ചപ്പത്തിയുടെ കൂടെ നല്ലൊരു കറിയാണ്.