Sunday, September 26, 2010

രസം, വട, രസവട



വട


ആവശ്യമുള്ള സാധനങ്ങള്‍

വടപ്പരിപ്പ് = 1/4 കി.
ചെറിയ ഉള്ളി = 100 ഗ്രാം
ഇഞ്ചി = ഒരു ചെറിയ കക്ഷണം
കായപ്പൊടി = 1/4 റ്റീ സ്പൂണ്‍
പെരും ജീരകം = 1/4 റ്റീ സ്പൂണ്‍
പച്ച മുളക് = 5 എണ്ണം
കറിവേപ്പില, ഉപ്പ്, എണ്ണ = ആവശ്യത്തിന്

പാചകം ചെയ്യുന്ന രീതി

പരിപ്പ് 20 മുതല്‍ 25 മിനുട്ട് വരെ കുതിര്‍ത്ത് വെള്ളം വാലാന്‍ വയ്ക്കുക.
ഉള്ളി, ഇഞ്ചി, പച്ചമുളക്, കറിവേപ്പില എന്നിവ ചെറുതായി അരിയുക.


പരിപ്പ് മിക്സിയില്‍ വെള്ളം ചേര്‍ക്കാതെ ചതച്ച് എടുക്കുക. അരഞ്ഞു പോകരുത്.

അരിഞ്ഞു വച്ചിരിക്കുന്ന ചേരുവകളെല്ലം ഇതില്‍ നന്നായി മിക്സ് ചെയ്യുക. ആവശ്യത്തിന് ഉപ്പും കായപ്പൊടിയും, പെരും ജീരകവും കൂടി ഇതിലേയ്ക്ക് നന്നായി ഇളക്കി ചേര്‍ക്കുക.

ചീനച്ചട്ടിയില്‍ എണ്ണ ചൂടാക്കുക. കുഴച്ച് വച്ചിരിക്കുന്ന കൂട്ട് കൈ വെള്ളയില്‍ എടുത്ത് ആകൃതി വരുത്തി ഒന്നമര്‍ത്തി തിളച്ച എണ്ണയില്‍ വറുത്ത് കോരുക.

വട റെഡി.
രസം


ആവശ്യമുള്ള സാധനങ്ങള്‍

പുളി = ഒരു നെല്ലിക്ക വലിപ്പത്തിന്
വെളുത്തുള്ളി = 4 അല്ലി

മുളക് പൊടി = 1/2 റ്റീ സ്പൂണ്‍
പച്ചമല്ലി ചതച്ചത് = 1/4 റ്റീ സ്പൂണ്‍

കുരുമുളക് പൊടി = 1/4 റ്റീ സ്പൂണ്‍

കായപ്പൊടി = ഒരു നുള്ള്

ഉലുവപ്പൊടി = ഒരു നുള്ള്
മഞ്ഞപ്പൊടി = ഒരു നുള്ള്
മല്ലിയില, ഉപ്പ് = ആവശ്യത്തീന്
താളിക്കാന്‍

വറ്റല്‍ മുളക് = 2 എണ്ണം
ചെറിയ ഉള്ളി = 1 എണ്ണം
കടുക് = 1 റ്റീ സ്പൂണ്‍
കറിവേപ്പില = 2 തണ്ട്
എണ്ണ = ആവശ്യത്തിന്

പാചകം ചെയ്യുന്ന വിധം

3 ഗ്ലാസ്സ് വെള്ളത്തില്‍ പുളി നന്നായി കലക്കി അരിച്ചെടുക്കുക.

വെളുത്തൂള്ളി ചതച്ചതും പച്ച മല്ലി ചതച്ചതും ചേര്‍ത്ത് മറ്റുള്ള മസാലകളും എല്ലാം കൂടി ചേര്‍ത്ത് നന്നായി തിളപ്പിക്കുക. ആവശ്യത്തിന് ഉപ്പും ചേര്‍ക്കുക. 2 മിനുട്ട് നന്നായി തിളയ്ക്കട്ടെ.

ചീനച്ചട്ടിയില്‍ എണ്ണ ചൂടാക്കി ചെറുതായി അരിഞ്ഞ ചെറിയ ഉള്ളി, കടുക്, വറ്റല്‍ മുളക്, കറിവേപ്പില എന്നിവ താളിച്ച് ചേര്‍ക്കുക.


ഇതിലേക്ക് മല്ലിയില അരിഞ്ഞത് ചേര്‍ക്കുക. രസം തയ്യാര്‍.


രസവട




രസവും വടകളും തയ്യാറാക്കിയല്ലോ. ഇനി രസവട തയ്യാറാക്കാന്‍ പ്രത്യേകിച്ച് ഒന്നും ചെയ്യാനില്ല. രസം തണുത്തതിന് ശേഷം വടകള്‍ ഇതിലിട്ട് വയ്ക്കുക. വടകള്‍ രസത്തില്‍ നന്നായി കുതിര്‍ന്നതിനു ശേഷം ഉപയോഗിക്കാം.

Friday, September 17, 2010

ചെമ്മീന്‍ തീയല്‍

അടുക്കളയില്‍ ഇന്നൊരു കൊഞ്ച് (ചെമ്മീന്‍) വിഭവമാണുണ്ടാക്കുന്നത്.

ഇത് ഉണക്ക ചെമ്മീനാണു കേട്ടോ.

ഉണക്കച്ചെമ്മീന്‍ കൊണ്ട് തോരന്‍, ചമ്മന്തി, തീയല്‍ ഇങ്ങനെ പല വിഭവങ്ങളും ഉണ്ടാക്കാം ഇന്ന് ഉണക്കച്ചെമ്മീന്‍ തീയലായിക്കോട്ടെ.

ആവശ്യമായ സാധനങ്ങള്‍
ഉണക്ക ചെമ്മീന്‍ = 200 ഗ്രാം
തേങ്ങ = അര മുറി
ചെറിയ ഉള്ളി = 150 ഗ്രാം
മുളക് പൊടി = 2 റ്റീ സ്പൂണ്‍
മല്ലിപ്പൊടി = 2 റ്റീ സ്പൂണ്‍
മഞ്ഞള്‍പ്പൊടി = 1/2 റ്റീ സ്പൂണ്‍
റ്റുമാറ്റോ (ഇടത്തരം) = 2 എണ്ണം
പച്ച മുളക് = 3 എണ്ണം
മുരിങ്ങയ്ക്ക = ഒരെണ്ണം
പുളി = അല്‍പം
കറിവേപ്പില = 2 തണ്ട്
വറ്റല്‍ മുളക് = 3 എണ്ണം
കടുക് എണ്ണ, ഉപ്പ് = ആവശ്യത്തിന്ന്

പാചക രീതി

ചെമ്മീന്‍ മണ്ണും അഴുക്കും കളഞ്ഞ് നന്നായി കഴുകുകി എടുക്കുക.




ഒരു ചീനച്ചട്ടിയിലോ, ഫ്രൈ പാനിലോ അല്‍പം എണ്ണ ഒഴിച്ച് തേങ്ങയും കുറച്ച് ചെറിയ ഉള്ളി അരിഞ്ഞതും ചേര്‍ത്ത് നന്നായി വറുത്തെടുക്കുക. കരിയാതെ ചെറിയ തീയിലിട്ട് ബ്രൗണ്‍ നിറമാകുന്നതുവരെ വറുക്കണം. നന്നായി വറുത്തുകഴിഞ്ഞാല്‍ അതിലേയ്ക്ക് മുളക് പൊടി, മല്ലിപ്പൊടി, മഞ്ഞള്‍പ്പൊടി എന്നിവ ചേര്‍ത്ത് ഒന്നു കൂടി വറുത്ത് വാങ്ങുക. തണുത്തതിനു ശേഷം മിനുസമായി അരച്ചെടുക്കുക.


അല്‍പം എണ്ണ ചൂടാക്കി ചെറിയ ഉള്ളി അരിഞ്ഞത് ചേര്‍ത്ത് വഴറ്റുക. പച്ച രുചി മാറിക്കഴിഞ്ഞാല്‍ നീളത്തില്‍ അരിഞ്ഞ റ്റുമാറ്റോ, ചെറിയ കഷണങ്ങളാക്കിയ മുരിങ്ങയ്ക്ക, പച്ചമുളക്, ഒരു തണ്ട് കറിവേപ്പില എന്നിവ ചേര്‍ത്ത് രണ്ടോ മൂന്നോ മിനിറ്റ് കൂടി വഴറ്റുക. ഇതിലേയ്ക്ക് അരച്ചു വച്ചിരിക്കുന്ന കൂട്ട് ചേര്‍ക്കുക. ആവശ്യത്തിനു വെള്ളവും ഉപ്പും ചേര്‍ത്ത് തിളപ്പിക്കുക. തിള വന്നാല്‍ കഴുകി വച്ചിരിക്കുന്ന ഉണക്കച്ചെമ്മീന്‍ ചേര്‍ക്കാം.

പുളി വേണമെങ്കില്‍ അല്‍പം പുളി കൂടി പിഴിഞ്ഞ് ചേര്‍ക്കുക. മീന്‍ പുളി ഇഷ്ടമുള്ളവര്‍ക്ക് അത് ചേര്‍ക്കാം. ഞാന്‍ മീന്‍ പുളിയാണു ചേര്‍ത്തത്.
ചെമ്മീന്‍ വെന്ത് ആവശ്യത്തിനു കുറുകിയാല്‍ വാങ്ങി വയ്ക്കാം. അധികം കുറുകാതെ ഇരിക്കുന്നതാണു നല്ലത്.

ഇനി ഇതിലേയ്ക്ക് കടുക്, വറ്റല്‍ മുളക്, ഒരു തണ്ട് കറിവേപ്പില എന്നിവ താളിച്ച് ചേര്‍ക്കാം.

ഉണക്കച്ചെമ്മീന്‍ തീയല്‍ റെഡി.